ច្រករបៀង២កន្លែងដំណើរការចេញទំនិញគេចពន្ធ បង់ពន្ធមិនគ្រប់នៅពេលយប់ ដែលជាប្រភពចំណូលពុករលួយមិនរីងស្ងួតរបស់លោក ខៀវ សាម៉េត មេគយច្រកអន្តរជាតិភ្នំដិន??
ខេត្តតាកែវ ៖ មានសេចក្តីរាយការណ៍មកថា ច្រករបៀងចំនួន២ កន្លែង ក្បែរច្រកអន្ដរជាតិភ្នំដិន មន្ត្រីជំនាញគយបាន ឃុបឃិតគ្នាជាមួយមេឈ្មួញដែលនាំទំនិញពីប្រទេសវៀតណាម ចូលតាមច្រកនោះរាប់ដោយមិនចាំបាច់បង់ពន្ធ គឺគ្រាន់តែបង់ប្រាក់ជូនមន្ត្រីជំនាញនានា ជាពិសេស មន្ត្រីគយ ដើម្បីបិទបាំងសកម្មភាពរត់ពន្ធទំនិញសំខាន់ៗចូលនៅទីនោះ។ សេចក្តីរាយការបានបន្តថា មេឈ្មួញដែលឈរជើងនាំទំនិញគេចពន្ធជាច្រចាំនោះ គឺឈ្មោះក្រៅហៅថា ចែហោស្រី (ជនជាតិវៀតណាមសុទ្ធ យកប្តីជាមន្ត្រីនគរបាល),ឈ្មោះហុង (ជាបងប្រុសចែហោស្រី) ឈ្មោះ ចាន់ថា និងចែពៅ ដែលមេឈ្មួញទាំង ៤នាក់នេះ រស់នៅឃុំទន្លាប់។ មេឈ្មួញទាំងនេះនាំទំនិញគេចពន្ធ ចូលតាមច្រករបៀងខាងលើនេះ យកមកស្ដុកទុក នៅចំណុចច្បារអំពៅ ខណ្ឌមានជ័យ ក្រុងភ្នំពេញ ហើយលក់បោះដុំឲ្យម៉ូយ ។
ប្រភពពីអ្នកដឹកជញ្ជូនទំនិញនោះ និងមន្ត្រីអាវុធហត្ថតូចតាចម្នាក់បានឲ្យដឹងថា ជាទូទៅទំនិញគេចពន្ធមានដូចជា ប្រភេទចាប់ហួយ, មេស្រា, គ្រឿងអេឡិចត្រូនិក, ម៉ាស៊ីនបូមទឹក, ក្នុងនោះមានគ្រឿងអេឡិចត្រូនិក របស់ក្រុមហ៊ុន Open net ត្រូវបានគេដឹកតាមរថយន្ដ ពី ប្រទេសវៀតណាម មកដល់ព្រំដែន លើកដាក់ទូកធំៗ ដឹកឆ្លងកាត់មកច្រករបៀងខាងលើ ទើបឈ្មួញហោស្រី ហុង ចាន់ថា និងចែពៅ បន្ដដឹកតាមរថយន្ត ទួរីស ចំណែកចែហោស្រី ក្រៅតែពីដឹកទំនិញតាមដឹកតាមរថយន្តទួរីស ក្នុង១យប់ៗ មានយ៉ាងតិចពី ៥ទៅ១០រថយន្ដទួរីស ដឹកពេញៗរថយន្ត។ ក្រៅពីនេះចែហោស្រី បានប្រើប្រាស់រថយន្តខ្នាតធំចំនួន២គ្រឿង ដឹកម៉ាស៊ីនភ្លើង ឬបូមទឹកពេញៗ ក្នុង១ឬ២សប្តាហ៍ដឹកចូលក្រុងភ្នំពេញយកមកលក់បោះដុំនៅផ្សារច្បារអំពៅម្តង ។
ប្រភពខាងលើបានបន្តថា ទំនិញគេចពន្ធជាច្រើនប្រភេទនោះ ក្រោមការឃុនឃិតពីមន្ត្រីគយ ត្រូវបានអនុញ្ញាតឲ្យឆ្លងកាត់ ច្រករបៀង ចាប់ពីម៉ោង ៨និង ទៅម៉ោង៩ យប់ដើម្បីបិទបាំងភ្នែកប្រជាពលរដ្ឋ ហើយបន្តធ្វើដំណើរ ឆ្លងកាត់លើកំណាត់ ផ្លូវជាតិលេខ២ ឆ្ពោះមកច្បារអំពៅ យ៉ាងយូរត្រឹមម៉ោង ១២ទៅម៉ោង១ រំលងអធ្រាត្រ។ការដឹកទំនិញល្មើសច្បាប់មិនបានបង់ពន្ធ ឆ្លងកាត់ខេត្តតាកែវ ខេត្តកណ្តាល និងក្រុងភ្នំពេញបានយ៉ាងរលូនដោយសារមេឈ្មួញជាពិសេសចែហោស្រី បានបង់សាច់ប្រាក់ស្រស់ៗជូនមន្ត្រីឈរតាមដងផ្លូវពេលយប់ ជាហូរហែមានគយចល័ត និងគយប្រចាំសាខាខេត្តខេត្តតាកែវ កណ្តាល អាវុធហត្ថ នគរបាលសេដ្ឋកិច្ចខេត្តតាកែវ កណ្តាល ក្រុងក្រុងភ្នំពេញ។ មានពេលខ្លះ មានកូនមន្ត្រីប្រដាប់អាវុធក្នុងក្រុងភ្នំពេញកាក់ ឡានដឹកទំនិញ ចែហោស្រី កោសរុសរកប្រាក់ទុកគ្រាន់បានគុយទាវកាហ្វេពេលព្រឹក ក៏មានលោកអតីតមេសាខាគយខេត្តកណ្តាល និងអតីតមេប៉េអឹមក្រុងភ្នំពេញធ្លាប់ ទូរស័ព្ទខ្វាត់ខ្វែកធ្វើអន្តរាគមន៍គម្រាមមន្ត្រីតូចតាចទាំងយប់។
ប្រភពខាងលើបានបញ្ជាក់ថា ប្រធានស្នាក់ការគយ និងរដ្ឋាករ ច្រកអន្ដរជាតិភ្នំដិន ដែលទើបទៅកាន់តំណែងថ្មី ទទួលបានប្រភពសេដ្ឋកិច្ច យ៉ាងខ្លាំងពី ច្រករបៀងទាំង២ បានឲ្យអនុប្រធាន១រូបឈ្មោះ បូ ជាអ្នកបន្តសកម្មភាពឃុបឃិត ប្រមូលប្រយោជន៍នៅទីនោះចែកគ្នាដាក់ហោប៉ៅ។ ការប្រព្រឹត្តអំពើពុករលួយដែលមិនខ្លាចក្រែងច្បាប់នេះ កំពុងតែធ្វើឲ្យរដ្ឋ បាត់បង់ចំណូលពន្ធយ៉ាងធ្ងន់ធ្ងរ ពិសេសមេគយ ច្រកអន្ដរជាតិភ្នំដិន កំពុងតែបំពានទំនុកចិត្តថ្នាក់លើ ។ ពាក់ព័ន្ធនឹង ទំនិញគេចពន្ធ នៅតែឆ្លងកាត់ច្រករបៀងទាំងនេះ មិនដឹងថា លោក គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា បានជ្រាបឬយ៉ាងណានោះទេ ពីព្រោះមន្ត្រីគយច្រកនោះ និងមន្ត្រីគយចល័ត លើកំណាត់ផ្លូវជាតិលេខ២ ខេត្ដតាកែវ ខេត្ដកណ្ដាល ត្រូវបានមេឈ្មួញទាំង៤ ដែលរកស៊ីល្មើសច្បាប់ ត្រូវរូវគ្នាអស់ទៅហើយ តាំងពីជំនាន់លោក ប៉ែន ស៊ីម៉ន ដឹកនាំមកម៉្លេះ។ តែគេមិនជឿថា លោក គុណ ញឹម ដើរតាមស្ទីល លោក ប៉ែន ស៊ីម៉ននោះទេ។
ជុំវិញសេចក្តីរាយការខាងលើើនេះអង្គភាព NYK មិនអាចសុំការបកស្រាយពីលោក ខៀវ សាម៉េត មេគយច្រកអន្តរជាតិភ្នំដិន បានទេដោយទូរស័ព្ទមិនអាចទំនាក់ទំនងបាន។ អង្គភាព NYK ស្វាគមន៍ការបកស្រាយបំភ្លឺរាល់ម៉ោងធ្វើការ បើសាម៉ីអង្គភាពគិតថាមិនត្រូវ ផ្សាយខុសពីការពិត ៕ ដោយ៖សហការីខេត្តតាកែវ