(ខេត្ត តាកែវ,ថ្ងៃទី ២១ ខែ គុម្ភៈ  ឆ្នាំ២០២៤)៖ដីទីទួលបុរាណ មួយកន្លែង ទំហំប្រមាណ១០០០ម៉ែត្រការ៉េ ជាប់ទល់មុខវត្ត ត្រកៀត ស្ថិតនៅ ក្នុងភូមិ ត្រកៀត ឃុំ ចំប៉ី  ស្រុក បាទី ខេត្ត តាកែវត្រូវបានបុគ្គលឈ្មោះ សួស សុភាព ហៅសេង ឈូសឆាយចាក់ដីលុបធ្វើសំណង់រឹង រំលោភយកធ្វើជាកម្មសិទ្ធិបុគ្គលឯកជន តែអាជ្ញាធរ និង មន្រ្តី ជំនាញបែរជាសម្ងំស្ងៀមមិនចាត់ការ ទប់ស្កាត់បន្តិចសោះឡើយ ។ តំណាងប្រជាពលរដ្ឋ ១៥៧គ្រួសារ ដែលរស់នៅក្នុងភូមិត្រកៀត បាន បានប្រាប់អ្នកសារព័ត៌មាននៅរសៀលថ្ងៃទី២១ ខែគុម្ភៈ ឆ្នាំ២០២៤ នេះថា ទួលបុរាណនេះមាន ទំហំដីប្រមាណជិត ១០០០ម៉ែត្រការ៉េ គេហៅថាទួលអង្គបុរាណភូមិត្រកៀត ដែលកើតមានតាំងពី ដូនតាមកម្ល៉េះ។ ហើយ មានព្រៃដើមឈើតូច ធំដុះ ស្រស់បំព្រងគួរអោយចង់គយគន់ និងជា កន្លែងសម្រាប់ពលរដ្ឋ ជិតឆ្ងាយគោរពបូជា និង ជាទីកន្លែងកប់សព បូជាសព នៅលើ ទួលនោះផងដែរ។ តំណាងប្រជាពលរដ្ឋបន្តឲ្យដឹងទៀតថាដោយមើលឃើញ ដីទួលបុរាណនេះធំទូលាយ ទុកសំរាប់កប់ ឬ បូជាសព ពិសេសសពដែលរកកន្លែងបូជា កប់បន្ទាន់  គឺគេយកទៅកប់ឬបូជានៅលើទួលបុរាណនោះ ។ ស្រាប់តែមកដល់បច្ចុប្បន្ននេះ មិនដឹងជាយ៉ាងម៉េចទេស្រាប់តែគេឃើញបុគ្គលឈ្មោះ សួស សុភាព ហៅ សេង បែរជាទៅសាងសង់សំណង់រឹងនៅលើដីទួលបុរាណនោះទៅវិញ ដោយគ្មានការយកចិត្តទុកដាក់ពីអាជ្ញាធរជំនាញ ចុះហាមឃាត់ ឬ ទប់ស្កាត់ឡើយ ។

តំណាងប្រជាពលរដ្ឋបញ្ជាក់បន្ថែមថា ពួកគាត់តំណាងឲ្យប្រជាជនក្នុងភូមិត្រកៀតចំនួន១៥៧គ្រួសារបានដាក់ពាក្យបណ្តឹងនៅសាលាឃុំ ចំប៉ី រួចហើយដើម្បីឲ្យអាជ្ញាធរមានសមត្ថកិច្ចជំនាញពាក់ព័ន្ធ ជួយទប់ស្កាត់ និង ហាមឃាត់បុគ្គលឈ្មោះ សួស សុភាព ហៅសេង តែអាជ្ញាធរឃុំចំប៉ីហាក់បីដូចគ្មានចំណាត់ការទល់តែសោះ  ។

ប្រជាពលរដ្ឋក្នុងភូមិត្រកៀតសំណូមពរដល់ លោក អ៊ូច ភា អភិបាលខេត្តតាកែវ និង មន្ត្រីជំនាញពាក់ព័ន្ធសូមមេត្តាជួយចាត់វិធានបង្ក្រាបនិងទប់ស្តាត់ឲ្យបានទាន់ពេលវេលាចំពោះបុគ្គលឈ្មោះ សួស សុភាព ហៅ សេង ដែលកំពុងប្រើសកម្មភាពរំលោភយកដីទួលបុរាណសាងសង់នេះផងទាន ។

ជុំវិញការលើកឡើងពីប្រជាពលរដ្ឋខាងលើនេះភ្នាក់ងារយើងមិនអាចទំនាក់ទំនងសុំការពន្យល់ណាមួយពីអាជ្ញារធរឃុំចំប៉ីនៅឡើយទេគិតត្រឹមថ្ងៃនេះ ៕ វគ្គ១